Berzahda kalır ermez ise bu garîb insân

Berzahda kalır ermez ise bu garîb insân 
Envâr-ı Muhammed ile enfâs-ı Mesîhâ 
Âh eyle gönül belki Huda eyleye ihsan 
Envâr-ı Muhammed ile enfâs-ı Mesîhâ 

Bu ikisidir zübde-i esrâr-ı hakikat 
Bir kâmile irgür var ise sende hamiyyet 
Bu ikiden izhâr olur esrâr-ı hüviyyet 
Envâr-ı Muhammed ile enfâs-ı Mesîhâ 

ister isen vuslatı derûn ile ara 
Kıllet ile zillet ile derd ile ara 
Nutkeyler olara erse seng ile hârâ 
Envâr-ı Muhammed ile enfâs-ı Mesîhâ 

Tevrat ile İncil ü Zebur Kâf ile ara 
Bu derde düşen zümre-i esnaf ile ara 
Bunlar ile erişirsin vuslat-ı yâra 
Envâr-ı Muhammed ile enfâs-ı Mesîhâ 

Esmalarına emr edip ol Kadir ü Mennân 
Bir "Ahsen-i takvim" le yaratıldı bu inşân 
Ol surete nefh eylediği Nefha-i Rahman 
Envâr-ı Muhammed ile enfâs-ı Mesîhâ 

Bil fer'indir âlemde olan nûr ile ervah 
Hep cümle maâdin ile zî-rûh olan eşbâh 
Aynı da değil gayrı değil ol buna agâh 
Envâr-ı Muhammed ile enfâs-ı Mesîhâ 

Ger ister isen sözlerime hücceti bürhân 
Meydânda durur Hazret-i Sâmî gibi sultân 
Cân ile gözü sem'i sözü vech ile yeksan 
Envâr-ı Muhammed ile enfâs-ı Mesîhâ 

Bundan geri Salih dahi sen olma mükedder 
Sami gibi bir sultânı hem kıldı müyesser 
Takdîr-i ezel sana da olmuştur mukadder 
Envâr-ı Muhammed ile enfâs-ı Mesîhâ